Seachtain Náisiúnta na hOidhreachta 2023

Le linn na n-ocht lá den imeacht, beidh pobail, daoine aonair agus eagraíochtaí ag reáchtáil imeachtaí ar fud na tíre chun ár n-oidhreacht nádúrtha, tógtha agus cultúrtha a cheiliúradh.


In 2022, bhí 1,800 imeacht ar fad ar siúl le linn Sheachtain Náisiúnta na hOidhreachta ó tharla gur tháinig imeachtaí i láthair go pearsanta ar ais arís. Bhí imeachtaí ar siúl i ngach contae agus iad á n-óstáil ag díograiseoirí a roinn a ngrá d'oidhreacht. I mbliana, tá téama nua i gceist agus bealach nua chun oidhreacht na hÉireann a fhiosrú, a roinnt agus a cheiliúradh.

Oidhreacht Bheo

Is é téama Sheachtain Náisiúnta na hOidhreachta 2023 ná Oidhreacht Bheo. Déanann “Oidhreacht Bheo” ceiliúradh ar chleachtais, eolas agus scileanna a cuireadh ar aghaidh ó ghlúin amháin go dtí an chéad ghlúin eile, agus atá fós in úsáid inniu. Maidir le Seachtain Náisiúnta na hOidhreachta na bliana seo, tugann an Chomhairle Oidhreachta spreagadh duit an obair a fhiosrú agus súil níos géire a thabhairt ar an obair atá déanta ag coimeádaithe ár n-oidhreachta. Déanfaidh téama Oidhreacht Bheo scrúdú ar an gcaoi ar iompaigh oidhreacht an lae inné go hoidhreacht an lae inniu, agus ar an gcaoi ar féidir an oidhreacht seo a chosaint do na glúnta atá le teacht, a bhuíochas le daoine a chuir a n-eolas ar fáil. Faoin téama seo, tabharfar spreagadh d’imeachtaí agus do thionscadail cleachtais doláimhsithe, eolas agus scileanna roinnte ó ghlúin amháin go dtí an chéad ghlúin eile a scrúdú. Sna míonna amach romhainn, roinnimid cad is brí le hOidhreacht Bheo agus an bealach le hOidhreacht Bheo a chuimsiú i d’imeacht nó do thionscadal.

Cad a bheidh ag tarlú le linn Sheachtain Náisiúnta na hOidhreachta 2023?

Is iomaí rud a bheidh ag titim amach sula mbeidh Seachtain Náisiúnta na hOidhreachta ar bun i mí Lúnasa. In Aibreán, beidh laethanta oiliúna ar bun in dhá shuíomh sa tír d’eagraithe imeachta agus tionscadail. Tabharfaidh na himeachtaí seo treoir ar dhea-chleachtas chun na himeachtaí a chruthú agus a reáchtáil. Fógrófar na sonraí ar heritageweek.ie go luath.


Gan mhoill, beidh suíomh gréasáin heritageweek.ie oscailte d’aighneachtaí sa chaoi agus go mbeidh tú in ann d’imeacht nó do thionscadal a chur faoina bhráid. Is féidir sonraí faoi imeachtaí agus tionscadail digiteacha atá curtha i gcrích a uaslódáil trí Thairseach na nEagraithe. Is é an lá deireanach chun tionscadal a chur faoi bhráid shuíomh gréasáin Sheachtain Náisiúnta na hOidhreachta ná Dé Máirt, an 22 Lúnasa.

Laethanta Téamacha

Lá an Pháiste Fhiáin


Beidh ‘Lá an Pháiste Fhiáin’ ar siúl ar an Satharn, an 20 Lúnasa. Baineann Lá an Pháiste Fhiáin le páistí agus a dteaghlaigh a spreagadh dul lasmuigh chun taitneamh a bhaint as an oidhreacht agus as a mbithéagsúlacht atá ina gceantar. Tabhair cuairt ar áit éigin nár thug tú cuairt air cheana nó téigh go háit éigin a bhfuil eolas maith agat air agus féach air ar bhealach difriúil. Trí théama Oidhreacht Bheo, spreagann an Chomhairle Oidhreachta páistí le dul lasmuigh agus cleachtais a fhiosrú a bhaineann lena dtírdhreach áitiúil.





Lá Oidhreachta Uisce


Beidh Lá Oidhreachta Uisce ar bun Dé Domhnaigh, an 21 Lúnasa, agus déanfar ceiliúradh ar oidhreacht ár n-aibhneacha, ár lochanna, ár mbogach agus ár bhfarraigí! Is comhoibriú é Lá Oidhreachta Uisce idir an Chomhairle Oidhreachta agus Clár Uiscí na nÚdarás Áitiúil. Tugtar cuireadh duit ar Lá Oidhreachta Uisce, Oidhreacht Bheo a fhiosrú a bhaineann lenár n-uiscebhealach agus lenár gceantair bhogaigh.